Игор Акинфеев истакна скромност по пласманот на Русија во четврт-финалето на Светското фудбалско првенство. Домашната селекција на турнирот ја елиминира Шпанија на пенали (4:3) пришто голманот на „зборнаја“ ги одбрани ударите на Коке и на Јаго Аспас за огромна радост на трибините на „Лужники арена“ во Москва, но и низ целата земја воопшто.
„Не се чувствувам како играч на натпреварот. Играч на натпреварот е целиот тим и навивачите“, рече Акинфеев и додаде дека неговата репрезентација покажа дека знае да игра фудбал.
Натпреварот во основниот дел заврши без победник – 1:1. Обата гола беа постигнати во првиот дел. Шпанија поведе со автогол на Сергеј Игнашевич во 12. минута, Русија возврати во 41. минута преку Артем Ѕјуба од пенал. Најстрогата казна за „зборнаја“ дојде како последица на игра со рака на Пике. Од тој момент до истекот на 90. минути и во двете продолженија по 15 минути мрежите мируваа, па третиот четвртфиналист на мундијалот го дадоа ударите од белата точка.
Иниеста, Пике и Рамос беа прецизни од 11 метри за Шпанија додека Коке и Аспас не успеаја против Акинфеев. Сите четворица руски пеналџии беа непогрешиви. Смолов, Игнашевич, Головин и Черишев го совладаа Де Хеа и заслужено го обезбедија опстанокот на Светското првенство.
Русија во четврт-финалето ќе игра со победникот од дуелот меѓу Хрватска и Данска што е во тек.
Шпанија – Русија 1:1 (на пенали 1:2)
Стадион: „Лужники арена“ во Москва. Гледачи: 78.011. Гл. судија: Бјерн Кујперс. Асистенти: Сандер ван Рокел и Ервин Зинстра (сите тројца од Холандија). Ж. картони: Пике (Шпанија); Кутепов, Зобнин (Русија). Стрелци: Игнашевиќ 12′ (автогол) за Шпанија; Ѕјуба 41′ (п) за Русија.
Шпанија (формација 4-2-3-1): Де Хеа – Алба, Рамос, Пике, Начо (Карвахал 70′) – Бускетс, Коке – Асенсио (Родриго 104′), Иско, Силва (Иниеста 67′) – Диего Коста (Аспас 80′). Селектор: Фернандо Јеро.
Русија (формација 5-3-2): Акинфеев – Жирков (Гранат 46′), Кудрјашов, Игнашевич, Кутепов, Фернандес – Кузјаев (Ерохин 97′), Зобнин, Самедов (Черишев 61′), Головин, Ѕјуба (Смолов 65′). Селектор: Станистав Черчесов.