Ако Иванов го даде мандатот на друг член на ВМРО-ДПМНЕ, тоа ќе биде второ кршење на Уставот. Првото било кога претседателот мандатот му го дал на Груевски кој немал мнозинство во Собранието.
Ако Груевски не успее да обезбеди мнозинство со ДУИ за да формира влада, а мандатот повторно се најде во рацете на ВМРО-ДПМНЕ, тоа ќе биде второ кршење на Уставот.
Професорите по уставно право, Осман Кадриу и Светомир Шкариќ, кои денеска учествуваа на дебата во организација на ЦИВИЛ, а каде беше партиципант и правникот Сотир Костов, ја отфрлаат можноста претседателот Ѓорге Иванов мандатот да го даде на друг член од ВМРО-ДПМНЕ и велат дека тоа е неуставно.
Кадриу вели дека е недопустливо и неуставно, Иванов повторно да го даде мандатот на ВМРО-ДПМНЕ, но на друго лице.
Според него, во оваа ситуација можни се две решенија.
„Ако Груевски не успее да формира влада, Иванов треба да и даде можност на опозицијата да формира влада. Второто решение е ако по 29 се постигне согласност за коалиција меѓу СДСМ и другите албански партии, претседателот по устав е должен да го додели мандатот на оваа партија. Ако тоа не се случи, ова мнозинство е доволно за да го свика собранието, да избере претседател на Собранието и после на седница на Собрание да се избере самата влада“, вели Кадриу.
Според професорот Шкариќ, доколку Иванов му го понуди мандатот на втор член на ВМРО-ДПМНЕ тоа ќе биде второ кршење на Уставот, затоа што прв пат во оваа ситуација го прекршил Уставот со тоа што му дал мандат на личност што нема обезбедено мнозинство.
„Претседателот треба да го даде мандатот на оној што ќе му понуди доказ дека има формирано мнозинство. Ако Груевски не успее да обезбеди мнозинство, а Иванов му го понуди мандатот на втор член на ВМРО-ДПМНЕ тоа ќе биде второ кршење на Уставот. Он излегол од Уставот со тоа што му дал мандат на личност што нема обезбедено мнозинство“, вели Шкариќ.
За шпекулациите кои кружат во јавноста, дека Иванов може да си даде оставка за да го спречи лидерот на СДСМ, Зоран Заев да формира влада, професорите велат дека тоа не е можно, затоа што Иванов и да не му го даде мандатот на Заев, ако партијата има мнозинство може да свика седница, да избере претседател на Собрание од своите редови и да формира влада.
Три дена до истек на рокот, се уште не се знае исходот од преговорите меѓу ВМРО-ДПМНЕ и ДУИ
Три дена пред законскиот рок се уште останува непознаница, не се знае дали ВМРО-ДПМНЕ и ДУИ ќе формираат влада. 29 јануари, недела вечер, е последниот рок во кој мандатарот Никола Груевски ќе треба да соопшти дали неговата партија ќе формира влада.
На потег е ДУИ. Утре вечер треба да се состане Централното претседателство на партијата кое ќе одлучи дали ќе коалицира со ВМРО-ДПМНЕ. На ова ќе му претходи состанок на потпретседателството на ДУИ кој што ќе се одржи денеска во Мала Речица во седиштето на ДУИ.
ДУИ е неединствена по прашањето за коалиција со Груевски. Таборот на Ахмети не сака да го менува Груевски, додека таборот на потпретседателите може да биде голема пречка во остварувањето на амбициите на долгогодишните коалициски партнери повторно да прават влада.