Во албанското пристаниште Драч е откриена и запленета нова количина на кокаин во контејнер со овошје, нарачка за компанијата „Алба Егзотик Фрут“ (Alba Exotic Fruit), за која и претходно беше откриена дрога во две пратки. Полицијата информира дека во продолжение на акцијата со кодно име „Рада“ биле извршени проверки и како резултат на истражните дејствија пронајдени се и запленети 7,25 килограми кокаин.  

– Во продолжение на акцијата „Рада“ започната на 13.07.2021 година, во пристаништето во Драч, каде што беа пронајдени и запленети 11,675 кг. кокаин, а на 23.07.2021 година уште 6,5 кг., како резултат на истражните дејствија, пронајдена и запленета е уште една количина кокаин. При контрола на неколку контејнери за компанијата „Alba Exotic Fruit“ запленети се 7,25 клограми кокаин, стои во полициското соопштение.

Дрогата во сите три случаи била скриена во контејнери со јужно овошје натоварено во Еквадор. При откривање на дрогата на 13 јули беше уапсен менаџерот на компанијата Бајрам Гумени додека по сопственикот Едуарт Даути сè уште се трага. 

 Даути, тогаш за албанските медуми кажа дека со семејството е во Франција, дека нема никаква поврзаност со тоа и оти веднаш штом се врати во Тирана ќе ја потврди својата невиност, но не го направи тоа.  

 Во Драч на 18 јуни беа запленети 324 килограми кокаин, во камион натоверен со железо чија крајна дестинација била Италија. Возач на камионот беше македонскиот државјанин Н.А.