Коалицијата на Алијанса за Албанците (АА) и Алтернатива на денешната прес-конференција соопшти дека нивни претставници немале ниту една официјална средба на тема за формирање на парламентарно мнозинство и влада и дека нема да преговараат се додека ДУИ не го исцрпи правото да биде дел од идната власт или да стане опозиција. За нив ДУИ е легален, но нелегитимен победник на изборите кај партиите на Албанците.
„Иако ние сме легитимни победници на изборите на 15 јули во албанскиот политички камп, сепак нема да влеземе во преговори, се додека ДУИ не го исполни предизборното ветување за премиер да биде Насер Зибери. Дури, како што кажавме, ако во Собранието дојде предлог Насер Зибери да биде премиер, ние со нашите 12 пратеници ќе гласаме за него. Но, ако ДУИ не успее да го реализира ова ветување, за што има легалитет, таа партија нема право да биде дел од идната влада и нејзиното место е во опозиција“, истакна на прес-конференцијата Скендер Зеид Реџепи, генерален секретар на Алтернатива.
Тој рече оти АА/А очекуваат ДУИ да остане на предлогот за премиер Албанец во следните четири години, колку што трае мандатот, и дека доколку тие бидат вклучени во разговори за формирање Влада, нема да бараат премиер Албанец.
Во однос на тркалезната маса што ја организираше ДУИ, а на која не присуствуваа лидерите на овие две партии, Зеид Реџепи истакна дека тие позитивно одговориле на поканата, но оти побарале средбата да се одложи за неколку дена и да се одреди дневен ред. Датумот не бил пролонгиран, така што според него, целта на оваа покана била тие да не учествуваат и средбата да не се одржи.
„Како и да е, без оглед на ова ние посакуваме Тркалезната маса на парламентарните албански партии да продолжи, како инструмент за координација на албанските ставови во Република Северна Македонија, и во иднина да се надминат овие пречки“, додаде Реџепи.