За Нова ТВ од Букурешт: Сашко Ѓ. Димовски
Мечот против Украина е како финале за нас, порача Езџан Алиоски на денешната прес-конференција во Букурешт во пресрет на вториот настап на Македонија на Европското фудбалско првенство. Фаворитската улога ја препушти на Украинците, додека за македонската селекција ја нагласи потребата од фокусот во текот на сите 90 минути, бидејќи шансите за пласман впо нокаут фазата на турнирот не се загубени по поразот од Австрија.
– Украина е фаворит и добро е што е така. Има добра репрезентација што го демонстрира во мечот со Холандија во кој постигна два гола. Но, наше е да не се предаваме и докрај да се бориме. Од дуелот со Автрија не треба да корегираме кој знае колку, победникот во тој натпревар го одлучија нијанси, рече Алиоски.
Ако треба да се корегираат некои работи, тие, смета фудбалерот на Лидс јунајтед, се однесуваат на играта во одбрана за која треба максимална концентрација.
– Против Австрија го одигравме првиот меч на Европските првенства пред очи на целокупната јавност на континентот. Атмосферата беше одлична пред мечот, но остана таква и по мечот и покрај поразот. Не недостасува ниту мотивација. Ова е едно големо искуство за нас. Пред нас е натпревар штпо мора да го добиеме, додаде Алиоски.
Мечот меѓу Македонија и Украина е во четврток од 15 часот на Националната арена во Букурешт по што националниот тим ќе отпатува во Амстердам на мегдан со Холандија (21 јуни, 18 ч.) во последниот меч од групната фаза на ЕП 2020.
Џани со дипломатски одговор: Беше тешко да се слушне што ми рече Арнаутовиќ, УЕФА може да „прочита“ од видеото
Неизбежно беше барањето на новинарите до Алиоски да објасни што точно му рекол Марко Арнаутовиќ за време на нивната „блиска средба“ во финишот на мечот меѓу Македонија и Австрија во неделата во Букурешт. Но, фудбалерот на Лидс јунајтед дипломатски одговори дека „не сака да шпекулира и оти најдобро може да се види од видеото што се ширеше по медиуми и социјални мрежи“.
– Разговаравме за време на мечот, по голот што го постигна, потоа и се ракувавме. Не би сакал да кажам што ми рече, кога не го слушнав. Беше тешко да се слушне. Тоа е нормално во фудбалот и во тоа нема ништо погрешно“, додаде Алиоски.