Американскиот Сенат ја усвои верзијата на даночните реформи со која значително се намалува данокот на заработувачка за компаниите, а се намалуваат и индивидуалните даночни стапки. Ова е најголемата даночна реформа во САД во изминатите 30 години.
Според овој Закон, највисоката стапка на доход за компаниите во САД, од сегашните 35 проценти, ќе се сведе на 21 процент.
Намалувањето на даноците беше одобрено во Сенатот со 51 глас за, наспроти 48 против. И во Сенатот и во досегашните гласања во Претставничкиот дом, само претставниците на Републиканската партија гласаа во поддршка на намалувањето на даноците, додека демократските претставници гласаа против.
Покрај намалувањето на даноците, мерката предвидува укинување на обврската американските граѓани да купат здравствено осигурување, која беше клучна одредба од пакетот здравствени реформи кои ги промовираше претходниот претседател Барак Обама.
– Сенатот го усвои најголемото намалување на даноците во историјата. Ужасната обврска од Обамакер е укината, напиша претседателот Доналд Трамп на својот Твитер профил, најавувајќи прес конференција штом даночната реформа помине низ Претставничкиот дом.
Трамп вели дека намалувањето на даноците и на регулативите ќе придонесе за уште побрз економски раст и зголемување на вредноста на акциите на американските берзи.