Домашната платежна картичка и ваучерите за домашен туризам ќе го ублажат падот на економската активност во третото тримесечје, како и падот на бројот на ноќевања во македонскиот туризам, изјави министерката за финансии Нина Ангеловска во гостување во емисијата „Агенда 35“.

Преку мерката за домашна платежна картичка ќе се даде финансиска поддршка на околу 325.000 граѓани. Министерката за финансии вели дека мерката е современа и системски осмислена за да стимулира безготовинско плаќање, намалување на неформална економија, купување на домашни македонски производи и услуги, а воедно ќе влее средства во стопанството за кус рок.

„Направивме една сумулација што ќе значат 28. милиони евра во економијата во така краток период од околу 30 до 40 дена. При таа симулација за третиот квартал од годината ако ние предвидуваме дека контракцијата или намалувањето на економската активност ќе биде 2,7 отсто, со влевање на сите овие средства, ќе забележиме нешто под 2 отсто, односно намалување за 0,7-0,9 процентни поени помал економски пад благодарение на средствата кои што ќе се влеат во економијата и кои ќе се потрошат кај погодените сектори за домашни производи и услуги“, вели Ангеловска.

Ангеловска посочува и дека ваучерите за домашен туризам ќе влијаат на помал пад на бројот на ноќевања.

„Тука би ја споменала и мерката за ваучерите за туризам преку која околу 10-12 милиони евра се поделија по 100 евра на група од 117.000 граѓани. Ако бројот на ноќевања во текот на оваа година, согласно случувањата би бил околу 50 отсто, со оваа мерка би бил двојно помал, односно би влијаело на помал пад на бројот на ноќевања и зајакнување на македонскиот туризам“, вели Ангеловска.