Селекторот на фудбалската репрезентација на Македонија, Игор Ангеловски ќе изведе комбиниран состав за утрешниот пријателски натпревар против Казахстан во Скопје, последен пред заминување за Букурешт на дебитантскиот настап на „црвено-жолтите“ на Европските првенства. За генералната проба пред континенталниот самит е неизвесен Ферхан Хасани кој се здоби со пукнатина на носот во мечот со Словенија и последниот збор околу него ќе биде на лекарскиот тим. Но, она што е најважно пред ЕП е излезот на Енис Барди од изолација поради ковид-19 и според најавите на Ангеловски, тој веднаш ќе почне со индивидуални тренинзи.
– Денеска на Барди му истекува рокот за изолација и веднаш ќе почне со индивидуални тестови, се додека не добие и негативен тест чии резултати ги очекуваме во текот на денот. Ако тестот биде негативен, ќе се приклучи на тимот, во спротивно ќе работи сам, рече Ангеловски на денешната прес-конференција пред средбата со Казахстан.
Во однос на утрешниот противник, Ангеловски истакна дека Казахстан има тим со млади играчи кои поседуваат квалитет и ќе бидат одлична можност за македонската селекција пред заминување на ЕП.
– Пред нас е последниот тренинг натпревар пред Европското првенство. Казахстан не е тим од калиброт на Гибралтар или Лихтенштајн, имаа добри и млади фудбалери и мислам дека ќе бидат можност за одлична проверка за нас. Што се однесува до нас, дел од стандардните играчи ќе играат, а дел ќе добијат поштеда, најави Ангеловски.
Натпреварот меѓу Македонија и Казахстан е утре попладне (17 часот) на арената „Тоше Проески“.