Англија ја оправда улогата на фаворит против Тунис и со победа стартуваше на Светското фудбалско првенство во Русија. „Гордиот албион“ славеше со 2:1 на „Волгроград арена“ со два гола на Хари Кејн од кои победничкиот во првата минута од судиското продолжение. Напаѓачот на Тотенхем во листата на стрелци се впиша и во 11. минута за водство на островската селекција што го анулира Саси од пенал во 35. минута по непромислениот удар со лакт врз противнички играч на Кајл Вокер.

„Среќен сум бидејќи игравме иако часовникот отчукуваше. Останавме смирени, не игравме колку да ја буткаме топката. Ја заслуживме победата. Создадовме толку шанси, особено во првото полувреме, а во второто имавме апсолутна контрола на работите. Добрите тимови постигнуваат голови во финишот на средбите. Ова е тимски триумф, тешко е да се издвојат поединци“, изјави Герет Саутгејт по мечот во Волгоград.

Покрај задоволство од играта и резултатот, англискиот селектор истакна дека е горд на  двократниот стрелец во натпреварот.

„Хари е врвен напаѓач. Воодушевен сум од него“, додаде Саутгејт.

Нареден ривал на Англија во групата Г ќе биде Панама на 24 јуни во Нижни Новгород. Ден претходно на „Откритје арена“ во Москва ќе играат Белгија и Тунис.

https://www.youtube.com/watch?v=2DaYzWWIsVA

Белгијците, пак, во првиот меч во конкуренцијата забележаа убедлива победа над Панама со 3:0 и на најдобар можен начин ги истакнаа своите амбиции за висок пласман на завршниот турнир. Двоен стрелец за „црвените ѓаволи“ беше Ромелу Лукаку во 69. минута и во 75. минута, првиот за нив беше дело на Дрис Мертенс во 47. минута.

Тунис – Англија 1:2 (1:1)

Стадион: „Волгоград арена“ во Волгроград. Гледачи: 41.064. Гл. судија: Вилмар Родман. Асистенти: Александар Гузман и Кристијан де ла Круз (сите тројца од Колумбија). Ж. картони: Вокер (Англија). Стрелци: Саси 35’ (п) за Тунис; Кејн 11’, 90’+1’ за Англија.

Тунис (формација 4-3-3): Хасен (Бен Мустафа 16’) – Малул, Брон, С. Бен Јусеф, Мериах – Саси, Бадри, Шкири – Слити (Бен Амор 74’), Хазри (Халифа 85’), Ф. Бен Јусеф. Селектор: Набил Малул.

Англија (формација 3-5-2): Пикфорд – Мегајр, Стоунс, Вокер – Јанг, Лингард (Даер 90’+3’), Хендерсон, Али (Лофтус Чик 80’), Трипие – Кејн, Стерлинг (Рашфорд 68’). Селектор: Герет Саутгејт.