Поранешниот американски потпретседател Џо Бајден е во предност од 11 проценти во однос на шефот на државата Доналд Трамп, покажува најновата анкета на Квинипек Универзитетот на Флорида што, патем, упатува дека Американците не се задоволни од начинот на кој актуелниот претседател се справува во борбата со ковид-19 во САД.
Според анкетата објавена синоќа, Бајден, сè поизвесен претседателски кандидат од Демократската партија, е поддржан од 50 проценти од гласачите, додека за републиканецот Трамп би гласале 39 проценти на претседателските избори во ноември.
Од регистрираните Демократи, 88 отсто изјавиле оти ќе гласаат за Бајден, а само пет отсто се изјасниле дека ќе гласаат за Трамп. Од Републиканците, пак, 87 отсто би гласале за Трамп, додека осум отсто го избираат Бајден. Резултатот кај независните е 47 отсто наспроти 36 отсто во полза на Бајден.
Бајден добива предност во анкетите во момент кога економските оператори во САД започнуваат со внимателно отворање на работата и покрај пандемијата на коронавирусот. Се повеќе гласачи не одобруваат како Трамп се справува со коронавирусот. Прашани кој кандидат сметаат дека ќе може подобро да се справи со епидемијата, 55 отсто му укажале доверба на Бајден, додека 39 отсто го избрале Трамп. Повеќето гласачи (57 отсто) сметаат дека Бајден подобро би се справил и со здравствената заштита во САД отколку Трамп (37 отсто).
Сепак, гласачите се поделени во однос на прашањето кој кандидат е подобар за економијата – 48 отсто сметаат дека тоа е Бајден, додека 47 отсто го посочуваат Трамп.
„Предноста на Бајден укажува дека довербата кон претседателот Трамп е нарушена. Како што се зголемува бројот на заразени од коронавирус, се доведува во прашање разумноста на Трамп, а ноември е сè поблиску“, изјави Тим Малој, анкетен аналитичар од Универзитетот Квинипек.
Анкетата е спроведена откако универзитетот Колумбија вчера објави анализа дека доколку мерките за физичка дистанца во САД би биле воведени две недели порано, односно на 1 март кога епидемијата започна да се шири, би биле спасени 36.000 животи. Во земјата досега од ковид-19 починаа над 96.000 лица, додека регистрирани се повеќе од 1,6 милиони заразени луѓе.