„Сино-жолт“ кошаркарски дрес со број 12 за премиерот на Република Македонија, Зоран Заев. И тоа не било каков туку шампионски и не е од било кого туку од Перо Антиќ. Поранешниот македонски репрезентативец го искористи престојот во Скопје за средба со претседателот на Владата на кого му подари дресот на Фенербахче со кој стигна до трета шампионска титула во Евролигата по двете што ги освои со екипата на Олимпијакос во 2012 година и во 2013 година.
„Кошарката во Македонија ќе оди напред. Му благодарам на Антиќ што препознава дека спортот го враќаме на спортските работници и среќен сум што се создаваат можности за тој да помогне во развојот на домашниот спорт. Му благодарам и за дресот на Фенербахче со кој тој и клубот ја освоија Евролигата“, е напишано над фотографијата на Заев и Антиќ објавена на Фејсбук профилот на македонскиот премиер.
Антиќ вчеравечер беше прогласен за кошаркар на годината во изборот на Македонската кошаркарска федерација (МКФ).