Битолскиот градоначалник Владимир Талески останува во куќен притвор. Апелацискиот суд не ја прифати жалбата на осомничениот и реши мерката 30 дневен домашен притвор да остане на сила. Повисокиот суд одлуката ја доставил до Кривичниот суд во Скопје, кој попладнево јавно ја соопшти.
„Апелационен суд Скопје до Основен суд Скопје 1 – Скопје ја достави одлуката за осомничениот В.Т. кој е опфатен во предметот на СЈО во јавноста познат како „Транспортер“ со која се потврдува решението на Кривичниот совет на Основен суд Скопје 1 – Скопје, а со тоа мерката куќен притвор останува за истиот.“, пишува во соопштението од Кривичмиот суд.
Талески е еден од осомничените во случајот Транспортер кој го отвори Специјалното јавно обвинителство, во кој 22 лица се товарат за незаконски тендери за транспорт на учениците од училиштата во регионот на Битола.
Истрагата опфаќа вкупно 81 криминално дејствие, спротивни на Законот за јавни набавки и Законот за средно и основно образование, а освен градоначалникот осомничени се уште 21 лице за злоупотреба на службената положба и проневера на пари.
За Талески првично од СЈО бараа само конфискација за дел од неговиот имот, бидејќи и тој се најде на листата на помилувани од Иванов. По укинување на аболицијата, СЈО побараа мерка притвор за него.
Талески е во домашен притвор од 20 јуни.