Аргентинската разузнавачка служба АФИ достави 500 досиеја до судските власти во кои се тврди дека има докази дека владата на поранешниот претседател Маурисио Макри шпионирала околу 400 новинари и речиси 100 други луѓе, јави официјалната новинска агенција „Телам“, пренесе ДПА.
Постојат сомневања дека во периодот меѓу 2015 година и 2019 година, владата на Макри ја искористила агенцијата за да ги шпионира новинарите, вклучително и странските, во врска со акредитацијата за самитите на Г20 и Светската трговска организација (СТО) што се одржаа во Буенос Аирес.
Владата на Макри е исто така осомничена и за шпионирање на политичари, водачи на граѓанското општество, научници и претприемачи. Властите барале информации за нивната политичка ориентација и ставовите кон социјалните прашања. Во 2019 година, конзервативецот Макри ги загуби изборите од Алберто Фернандез во услови на голема економска криза.