Марин Чилиќ го совлада Кеи Нишикори со 2:1 (по сетови: 3:6, 6:2, 6:3) во последниот меч од групната фаза на тенискиот Мастерс во Лондон. Победата на Хрватот е пирова бидејќи и пред мечот загуби секакви шанси за полуфинале по поразите од Вавринка и од Мареј. Но, се задржа на теренот повеќе одошто мислеше јапонскиот тенисер кој, пак, беше сигурен дека продолжува по поразот на Вавринка од Мареј.
Нишикори делуваше дека набрзина и лесно ќе заврши во групата по воведниот сет што го реши во своја корист со 6:3. Меѓутоа намерата да заштеди сили и да добие макар еден час повеќе за одмор и подготовка за полуфинале паднаа во вода. Чилиќ покажа решителност да не замине од Лондон без победа во што и успеа, а тоа ќе значи дека ја завршува годината како шести на АТП ранг листата. Двапати освојуваше гем на сервис на Јапонецот во вториот сет за конечни 6:2 и израмнување на 1:1. Идентично беше и во решавачкиот трет сет.
Мареј не дозволи изненадување во дербито против Вавринка и со 6:4, 6:2 го порази швајцарскиот тенисер и со максимален ефект во групата А продолжува во полуфинале.
Денешниот ден е резервиран за полуфиналните пресметки во „О2 арена“. Програмата ја отвораат Мареј и Раониќ во 15 часот, Ѓоковиќ и Нишикори ќе излезат на мегдан во 21 часот.