Австралиската војска денеска соопшти дека ќе распореди илјадници свои припадници на улиците во некои градови за да спречи втор бран на зараза на коронавирусот. Сојузната држава Викторија бележи зголемување на бројот на новозаразени со Ковид-19, со речиси 150 случаи на ден во текот на изминатата недела и со жариште во Мелбурн.
Иако бројот е сè уште мал во споредба со другите земји во светот, избувнувањето на заразата ја загрижи Австралија чии власти почнаа со олеснување на рестриктивните мерки по, како што оценија, успешното справување со вирусот.
Министерката за одбрана Линда Рејнолдс денеска соопшти дека илјадници војници ќе бидат испратени на улиците на Мелбурн „во наредните денови“. Околу 850 војници ќе ги надгледуваат патниците од странство кои се сместени во карантин во хотелите, додека околу 200 други ќе обезбедат логистичка и медицинска помош на локациите за тестирање, додаде министерката.
Австралиската војска веќе е на терен и ги чува границите на сојузните држави кои се затворени за посетители, но новото излегување на улиците на толку голем број војници е без преседан во кризата со коронавирусот.
Вирусот во вториот по големина град во Австралија се прошири во пошироки семејства, хотел за карантин за странски патници во карантин и во продавница за облека. Австралија на 25 милиони жители до сега регистрира околу 7,500 случаи на зараза, со 103 смртни случаи.