Герет Бејл го продолжи договорот со мадридски Реал до 2022 година. Документот за обновување на соработката и за наредните шест сезони го прават репрезентативцот на Велс да биде најплатен фудбалер на сите времиња.
Шпанските медиуми пишуваат дека Бејл на годишно ниво ќе заработува 20 милиони евра или 384.615 евра неделно кога ќе се одбијат сите даночни обврски. На Пиринеите од претходно е познато дека Кристијано Роналдо го чини „кралскиот клуб“ 319.560 евра во една работна седмица што значи дека Велшанецот и дефинитивно е поплатен од Португалецот во моментот.
Вртоглавите бројки во неговата платна листа на „Бернабеу“ може да се анализираат на разноразни начини. На дневна основа, на пример, секое утро Бејл ќе се буди со нови 54.945 евра. Или, пак, секој час ќе значи нови 2.289 евра од претходниот. И така час за час, ден за ден, недела за недела и месец за месец до летотово 2022 година.
Според државниот завод за статистика на Македонија, просечната месечна исплатена нето-плата по вработен во август оваа година изнесувала 22.294 денари или 362,5 евра (по курс 61,50 денари за 1 евро). Тоа упатува на заклучок дека Бејл на секои 10 минути ќе заработува по просечна македонска плата.
Велшанецот пристигна во Реал Мадрид во 2013 година од Тотенхем за тогаш рекорден трансфер од 100 милиони евра. Ако некој клуб сега изрази желба да го ангажира, ќе мора да плати пола милијарда евра на колку што гласи откупната клаузула од неговиот нов договор.
Бејл досега одигра 134 натпревари за Реал Мадрид и постигна 62 гола. За Велс има 64 настапи и 25 гола. Има две титули во Лигата на шампиони и по една во Супееркупот на УЕФА, на светското клупско првенство и во купот на Шпанија.