Борис Бекер експресно најде работа по само еден ден од разделбата со Новак Ѓоковиќ. Трикратниот освојувач на Вимблдон ќе биде ангажиран како стручен коментатор на „Евроспорт“ за чија програма на германски јазик ќе прави секојдневни анализи на мечевите на Австтралија опен, првиот гренслем тениски турнир во сезоната. Веста за соработката со Германецот ја објави специјализираната спортска ТВ куќа.
„На љубителите на тенисот во Германија сакам да им приближам врвни моменти и особено шармот и атмосферата на гренслемот о Мелбурн што го освојував двапати во мојата кариера“, рече Бекер.
Германецот додаде дека е презадоволен од склучената соработка со „Евроспорт“ и се радува на можноста да ужива во голем број часови врвен тенис.
„Со нетрпение го чекам почетокот на турнирот. Ме интересира дали нашиот број еден Анџелик Кербер и, секако, Новак Ѓоковиќ, ќе можат да ги одбранат титулите на Австтралија опен“, дополни германската тениска легенда.