Наскоро ќе се воведе нов модел на тарифа на струјата, изјави министерот за економија, Крешник Бектеши во „10 минути“ на ТВ21.
Министерот вели дека со новите тарифи помалку ќе плаќаат граѓаните кои помалку трошат на струја, а имаат помали приходи.
„Ќе воведеме блок-тарифи со единствена цел да имаме тарифа која ќе биде еднаква за сите граѓани во зависност од потрошувачката на граѓаните, но и во зависност од приходите на граѓаните“, рече Бектеши.
Бектеши информираше дека поевтинувањето на цените на маслото за јадење ќе се случи доколку дојде до целосно отворање на увозните коридори во Украина.
Според него, тоа зависи од светските пазари и зависи од цените на сончогледот и нерафинираното масло кои главно се увезуваат од Украина и Бугарија.
-Треба да бидеме солидарни. Во консултација со локалните производители овозможуваме извоз на рафинирано масло за јадење. Имаме потребната количина за производство, рече Бектеши во емисијата „10 минути“ за извозот на зејтин во Албанија.