По повеќедневни преговори, Белгија ја објави листата на дозволени дестинации за своите граѓани, а меѓу нив не е Северна Македонија, јави дописничката на МИА од Брисел. Со ова Белгија ја следи и препораката на Советот на Европската Унија (ЕУ) кој на 30 јуни објави препорака до сите 27 земји членки за отворање на границите. Белгија дури денеска го соопшти конечниот договор.
За Северна Македонија, белгиското Министерство за надворешни работи објаснува дека „бројот на случаи на Ковид-19 во земјата силно и постојано расте. Епидемиолошката состојба јасно се влоши од почетокот на јуни месец“.
Поради ова, белгиските власти оценуваат дека за нивните граѓани патувањата надвор од ЕУ, вклучително и Северна Македонија остануваат забранети. Што се однесува до Србија и Црна Гора, кои се на белата листа на Советот на ЕУ, Белгија сепак одлучи дека само патувањата од „суштинско значење“ се дозволени во овие земји.