Во Босна и Херцеговина, која имаше големи проблеми со добивање на вакцини против коронавирусот, ќе бидат уништени илјадници дози поради изминат рок за употреба. Крајниот рок за употреба на 340.183 дози на вакцини против ковид-19 во Федерацијата БиХ истекува следниот месец, соопшти Институтот за јавно здравје на ФБиХ.
Ако не се искористат навреме, 319.390 дози на вакцини на „АстраЗенека“, 19.536 дози од вакцината на „Фајзер“ и 1.257 дози од вакцината на „Синовак“ ќе мора да бидат уништени. Вториот контингент на вакцини на кои им истекува рокот во ноември е – 25.170 на „АстраЗенека“ и 10.530 на „Фајзер“, додека во декември истекува рокот за уште 64.350 дози на вакцини.
Директорот на Институтот за јавно здравје на Република Српска, Бранислав Зељковиќ изјави дека повеќе од 55.000 дози на вакцини на „АстраЗенека“ веќе пропаднале во РС. Рокот им измина на крајот на јули и почетокот на август, а сега се подготвува уништување.