Во Обвинителството на БиХ оваа недела почнаа серија сослушувања на лидерите на политичките партии на Република Српска (РС), како дел од истрагата за сомнежи за кршење на уставниот поредок, а денеска исказ даде еден од опозициските лидери Мирко Шаровиќ.
Според достапните информации, Обвинителството на БиХ ја отвори истрагата откако Народното собрание на РС, на 10 декември, ги усвои заклучоците со кои се повлече согласноста на ентитетот за државните закони за одбрана и безбедност, даночниот и царинскиот систем и Високиот судски и обвинителски совет (ВССК).
Тие заклучоци беа предложени од владеачкото мнозинство собрано околу Сојузот на независни социјалдемократи (СНСД) на Милорад Додик, кој со месеци наназад најавуваше вакви одлуки. Тој, исто така, предложи РС да ги преземе сите овластувања што има намера да ѝ ги ускрати на државата во рок од шест месеци.
Опозициските партии не ги поддржаа предлозите на Додик, а нивните претставници го бојкотираа гласањето за заклучоците, што беше причина за истрагата на државното обвинителство.
Немав ништо посебно да кажам, бидејќи се воздржавме од седницата на Народното собрание и не бевме присутни за време на гласањето, изјави претседателот на Српската демократска партија (СДС), Шаровиќ пред новинарите по едночасовното сведочење пред државниот обвинител во Сараево.
Пред него, исто така, сведочеше и Горан Селак, лидер на Социјалистичката партија на РС. Тој појасни дека осомничени за уривање на уставниот поредок се всушност водачите на владејачките политички партии, меѓу кои и Милорад Додик, како и претседателката на РС, Жељка Цвијановиќ и ентитетскиот премиер, Радован Вишковиќ.
Никој од нив сè уште не е сослушан, но Цвијановиќ веднаш оцени дека се работи за политички процес и тврди дека РС на ниту еден начин не го доведува во прашање уставниот поредок на БиХ.
Кривичниот законик на БиХ пропишува казни од најмалку пет години затвор за кршење на уставниот поредок.