Вицепремиерот за економски прашања Фатмир Битиќи и новоименуваниот амбасадор на Кралството Шпанија во земјава, Хозе Луис Лозано Гарсија на денешната средба изразија подготвеност за продолжување на меѓусебните контакти, со цел интензивирање на економската соработка и создавање на уште поцврсти односи меѓу двете пријателски земји.
Исто така, Битиќи му честитал на амбасадорот Лозано Гарсија за новото именување, при што му посакал успех за време на мандатот и притоа ги истакнал добрите политички односи меѓу Северна Македонија и Кралството Шпанија.
Дополнително, вицепремиерот Битиќи се осврна и на потенцијалот на нашата држава како дестинација за странските инвестиции, бидејќи ние како земја со последните законски промени го имаме еден од најатрактивните пакети за поддршка на инвестиции во преработувачката индустрија, и истиот е целосно во согласност со ЕУ директивите, соопштија од Кабинетот на вицепремиерот.
Амбасадорот Лозано Гарсија го потврдил интересот на шпанските компании за инвестирање во Северна Македонија, особено во секторите градежништво и во ИТ секторот каде се најприсутни до сега, како и потенцијалот во секторите за третирање на отпадни води и третман на цврст отпад за кои исто така постои голем интерес од нивна страна.
Соговорниците разговарале и за економската соработка меѓу двете земји, при што е констатирано дека оваа година, има зголемена трговска активност во однос на претходните години.