Гордост и чест се силните признанија и поддршка за Северна Македонија што денеска ни пристигнаа од Вашингтон, директно од државниот секретар на Соединетите Американски Држави Ентони Блинкен, на средбата со нашиот премиер Димитар Ковачевски, напиша вечерва на својот фејсбук-профил вицепремиерот задолжен за економски прашања и инвестиции Фатмир Битиќи.
Тој истакна дека традиционално добрите односи меѓу Северна Македонија и САД од минатата година се унапредени во стратешки дијалог, што е највисокиот формат на соработка на оваа земја во билатералните односи со суверените демократски држави.
Со САД сме партнери во споделувањето на највисоките заеднички демократски вредности и во почитувањето на човековите права, додаде вицепремиерот.
Според Битиќи, државниот секретар Блинкен исклучително отворено и директно ја изразил длабоката почит на Вашингтон за начинот на кој Северна Македонија претседава со ОБСЕ во исклучително драматичен и безбедносно предизвикувачки период, што ја прави нашата земја доверлив и сигурен партнер со кој се менаџираат прашања од највисок интерес за меѓународната безбедност.
Ова длабоко взаемно почитување и негување на билатералните односи е силна мотивација и за економската соработка за која државниот секретар Блинкен јасно потенцираше дека Северна Македонија ја има силната поддршка за стратешките инфраструктурни проекти кои ќе ја стават земјата на високо рамниште во процесот на интеграцијата во членство во ЕУ, пишува вицепремиерот Битиќи.
Тој порача дека треба да ги прифатиме како признание и заложбите на САД за унапредување на енергетска безбедност за Северна Македонија. Многу е важно што можеме и понатаму да сметаме на поддршката на Америка во изградбата на идните големи инфраструктурни проекти во делот на енергетиката.
Партнерството со САД е мотор и мотиватор на нашата интеграција преку која македонската иднина ја правиме подобра, оцени Битиќи.