Со скринингот за ковид-19 ќе бидат опфатени 364 основни и 109 средни училишта во земјава, информираат од Министерството за здравство (МЗ). Од таму потенцираат дека тестирањето ќе започне во текот на наредната недела, по добиена писмена согласност од родители или старатели на учениците.
Министерството за здравство соопшти дека ќе спроведе скрининг со брзи антигенски тестови, во кој ќе бидат опфатени 8.178 ученици во 80 општини и градот Скопје, во рамки на активностите за превентивни тестирања со цел рано детектирање и превенција од ковид-19 во основните и средни училишта.
Скринингот во училиштата ќе овозможи да се добијат релевантни податоци за можно асимптоматско ширење на вирусот, односно дали истиот се шири низ училиштата и каква е трансмисијата.
Вчера беше забележан раст на бројот на новозаразени во однос на претходните денови. Од направени 2.900 тестирања беа регистрирани 421 случај, што е 14,5 отсто. Претходно тој процент се движеше околу 11 проценти. Според епидемиолошките анализи, најмногу активни случаи во моментот има во Скопје – 3.308, во Куманово – 543, во Велес – 304, во Штип – 212, во Охрид – 206, итн.
Досега се ревакцинирани 45 отсто од полнолетните граѓани. Заклучно со 13 октомври, како што се посочува од МЗ, вкупно се вакцинирани 797.214 граѓани, ревакцинирани се 756.176, а трета доза примиле 982 граѓани. Педесет и три отсто од граѓаните над 40-годишна возраст се ревакцинирани, а 33 отсто од популацијата од 18 до 39 години примиле една доза вакцина.
Опфатот со вакцинација со една доза на вакцина на полнолетната популација е 47 отсто, а со две дози се опфатени 45 отсто од граѓаните над 18 години. Според бројот на аплицирани вакцини, 38 отсто од целата популација во нашата земја е вакцинирана, а 35 отсто од популацијата во државата примила две дози вакцина, информираат од МЗ.
На предлог на Комисијата за заразни болести, Владата завчера на седница донесе заклучок за измена на Протоколот за организирање на настани во затворен простор во театри, во кина, во филхармонија и други објекти, со што се зголемува дозволената исполнетост од капацитетот на салата со публика на 50 проценти, наместо досегашните 30.
Во врска со овој протокол, како што информираше владината прес-служба, се воведува и условот посетителите да бидат вакцинирани со две дози со вакцина против ковид-19, a останува обврската на организаторот да ги спроведува и контролира сите останати препорачани превентивни мерки за спречување ширење на вирусот и да организира редарска служба за контрола на мерките.