Биотехнолошките компании во многу државиво светот во моментот се центар на внимание на инспекциски служби по шпекулациите дека, наводно, продаваат крв од излекувани пациенти од ковид-19. Како што пишува „Њујорк тајмс“, некои компании моментно остваруваат вртоглави профити од продажба на минимални количини на крв со антитела. На тоа укажуваат документи, мејлови и ценовници до кои дојде американскиот весник, а вредноста, како што се наведува, се одредува според присуството на антитела во примерок на крв од луѓе кои успешно ја прележале болеста.
Како една од таквите компании се посочува „Кантор БиоКонект“ од Калифорнија која наплаќа од 350 до 40.000 долари за милилитар крв. Во таков бизнис се споменува и компанија од Индија која со крв со антитела за коронавирус наплатила дури 50.000 долари.
„Никогаш не сум видел да се продава крв по толкави цени“, вели Џои Фицџералд, медицински директор на компанијата „Молоџик“ од Велика Британија.
На истражителите кои се обидуваат да развијат тестови на антитела им требаат примероци од луѓе кои биле заразени со ковид-19 и чиј имунолошки систем научил да создава антитела за борба со болеста. Затоа се прави нелојална конкуренција која и тоа како им штети на истражувачите кои се борат со коронавирусот што резултира со намален одзив на оние кои доброволно ќе дадат крв, кога веќе може да заработат од неа.
Компаниите за кои пишува „Њујорк Тајмс“ нудат неколку стотина долари на лицата кои сакаат да донираат крв. Една пациентка која била во морална дилема е Алесија Џекинс од Вашингтон. Таа била во преговори со „Кантор БиоКонект“, но, сепак, се предомислила кога дознала по која цена ќе биде продавана нејзината крв.
„Многу е тажно и погрешно да се користи пандемијата за профит“, изјави Џекинс.