Бојан Јовановски Боки-13 денеска во скопското Јавно обвинителство поднел кривични пријави против повеќе носители на јавни функции, членови на нивните семејства и бизнисмени. За тоа информира преку рачно напишано соопштение чија содржина пред ОЈО Скопје ја прочита неговиот адвокат Сашо Дуковски.
Во писмото, Јовановски вели дека поднел кривични пријави против повеќе носители на јавни функции, членови на нивните семејства и бизнисмени за кои, како што напишал, треба да одговараат за злоупотреба на службена положба, измама и давање лажен исказ. Неговиот адвокат Дуковски рече оти очекува од Обвинителството да отвори предмети по поднесените кривични пријави по документирање на случаите.
„Одговорно ви тврдам дека нема да ме спречат, што и да сакаат да применат и било кои методи на уцени и на закани. Единствено ќе ме спречат доколку ме лишат од живот, односно доколку посегнат по мојот живот“, вели Јовано вски во писмото.
Бојан Јовановски-Боки 13 е осуден на девет години затвор со неправосилна пресуда во случајот „Рекет“ во кој беше обвинет за „примање награда за противзаконито влијание“ и за „перење пари“, заедно со поранешната СЈО Катица Јанева, која доби затворска казна од седум години за „злоупотреба на службена положба и овластување“. Против Јовановски и петмина други се води и уште еден предмет за „измама“ и „перење пари“ преку невладината организација „Меѓународен сојуз“, чиј основач е тој.