Ако поразот на С. Македонија од Аргентина во првото коло на Светското ракометно првенство за ракометари до 19 години беше изненадување, вториот дојде како очекуван. Данска славеше со 29:26 (полувреме 13:11) и по четврти пат ја потврди фаворитската улога во групата Ц. Но, овојпат селекторот Данило Брестовац не беше дотолку критички настроен кон своите избраници. Истакна дека играта оди во нагорна линија, се функционира понормално, се зголемува ефектот и на ротација, а за нешто повеќе против ривал каква е данската репрезентација треба и голман на ниво.

„Иако се пројавија некои технички грешки во првото полувреме, сепак, сум задоволен од играта. Мислам дека има промена за разлика од претходните три меча и впечаток е дека се подобруваме. Функционираме подобро, полека се видливи ефекти од ротацијата, играме подобро, но недостасуваа голмански интервенции, особено во второто полувреме. Данска, сепак, е една од најдобрите селекции во младинските категории“, рече Брестовац.

Листата на стрелци во македонската репрезентација ја предводеше Мартин Серафимов со девет гола пред Ненад Костески кој постигна шест колку што реализираа Јепе Цислак и Макс Хоксе Хангард за победничкиот тим.

Сите натпревари од последното, петто, коло од групната фаза се играат утре (понеделник), а ривалот на С. Македонија од 20.30 ч. во СЦ „Борис Трајковски“ ќе биде репрезентацијата на Јапонија во директен дуел за второто место во групата Ц.

СП во ракомет (У19) во машка конкуренција

Група А, 4 коло

Саудиска Арабија – Норвешка 23:35

Словенија – Хрватска 21:31

Шпанија – Чиле 31:21

Табела: Хрватска 8 бода, Шпанија 7, Норвешка 5, Словенија 4, Чиле 0, Саудиска Арабија 0.

Група Б, 4 коло

Унгарија – Шведска 28:29

Франција – Тајван 32:23

Канада – Египет 20:47

Табела: Шведска 6 бода, Унгарија 6, Франција 6, Египет 6, Тајван 0, Канада 0.

Група Ц, 4 коло

С. Македонија – Данска 26:29

Нигерија – Јапонија 30:35

Бахреин – Аргентина 24:25

Табела: Данска 8 бода, Јапонија 6, С. Македонија 4, Аргентина 4, Бахреин 2, Нигерија 0.

Група Д, 4 коло

Србија – Исланд 22:26

Португалија – Тунис 30:24

Германија – Бразил 28:22

Табела: Португалија 8 бода, Германија 6, Исланд 6, Србија 2, Тунис 2, Бразил 0.