По нападот на бомбашот-самоубиец во Манчестер, во кој загинаа 22 лица вклучувајќи и деца, Британија го крена нивото на закана од тероризам на највисоко ниво.
Премиерката на Британија Тереза Меј, по вториот итен состанок на одбророт Кобра за реакција во кризни ситуации, рече дека војници ќе бидат распоредени за да ѝ помагаат на полицијата да ја одржи безбедноста.
Меј рече дека припадници на вооружените сили ќе бидат распоредени на клучни локации за да ја ослободат полицијата од патролирање, а војници би можело да бидат распоредени и на јавни настани како концерти и спортски настани, бидејќи се смета дека потенцијално непосредно се заканува нов напад.
Меј рече и дека независното тело што го определува нивото на закана препорачало тоа да се качи на „критично“ веднаш откако човекот кого полицијата го именува како Салман Абеди предизвика експлозија со импровизирана бомба ноќта во понеделникот додека публиката излегувала од концерт.
„Ова значи дека нивната процена не е само дека уште еден напад останува мошне веројатен, туку и дека можеби се неизбежни понатамошни напади. Денешната истрага откри дека постои можност што не можеме да ја игнорираме, дека постои поголема група лица поврзани со овој напад“, рече Меј.