Српската премиерка Ана Брнабиќ се запозна со актуелната состојба во однос на движењата на мигрантите и координацијата во работата на државните органи. На состанокот во Белград, на кој учествуваа и вицепремиерот и министер за внатрешни работи Небојша Стефановиќ, министерот за одбрана Александар Вулин, министерот за здравство Златибор Лончар и комесарот за бегалци и миграција Владимир Чучиќ, било истакнато дека нема зголемен притисок на мигранти на границите на Србија, дека состојбата на границата меѓу Турција и Грција се стабилизира, истакнувајќи дека бројот на мигранти е на исто ниво како и во претходните месеци, соопштија од српската влада.
Учесниците на состанокот ја известиле премиерката Брнабиќ за мерките кои ги спроведуваат државните институции, оценувајќи дека ситуацијата е под контрола и дека нема закани по безбедноста на земјата и оти се спроведува нулта толеранција за нелегални премини. На Министерството за здравство му е наложено да воспостави карантин за мигрантите, како уште една форма на дополнителна заштита од коронавирусот.
Од почетокот на мигрантската криза, низ Србија минаа над еден милион мигранти, додека во моментот околу 6.000 лица се наоѓаат во вкупно 17 прифатни центри и тој број е непроменет, се наведува во соопштението на српската влада.
„Вечерњи Новости“ и „Танјуг“, повикувајќи се на неименувани извори, објавија дека „српскиот претседател Александар Вучиќ и наредил на војската, полицијата и на Безбедносно-информативната агенција (БИА), речиси, херметички да ја затворат границата на Србија кон Северна Македонија, доколку дојде до наплив на мигранти кои со денови се обидуваат да влезат во Грција, од турска страна“. Вучиќ пред два дена на вонредна прес-конференција изјави дека Србија ќе ја заштити својата територија и нема да дозволи „да стане паркинг за мигрантите“.