Туниските власти ги негираа тврдењата дека еден од бродовите од Глобалната флотила за Газа, во која учествува активистката Грета Тунберг, бил погоден од дрон.
Според организаторите на флотилата, бродот бил погоден додека бил закотвен пред пристаништето Сиди Бу Саид во Тунис. Сите шест патници и членови на екипажот се безбедни.
Сепак, Туниската национална гарда тврди дека немало напад со дрон, додека првичниот преглед покажал дека се случила експлозија во внатрешноста на бродот.
Организаторите на флотилата велат дека нивната цел е да ја „пробијат нелегалната опсада на Газа од страна на Израел“, но досега не успеале. Во јуни, израелските сили се качија на брод што превезувал хуманитарна помош за Газа и приведоа 12 активисти, вклучувајќи ја и Тунберг. Потоа беа депортирани од земјата, а израелските власти ги окарактеризираа обидите за испраќање помош во Газа со бродови како публицитет.
И претходно имаше тврдења дека бродовите што се упатуваат кон Газа биле нападнати од дронови. Флотилата на слободата соопшти дека еден од нејзините бродови бил погоден од дрон покрај брегот на Малта во мај.
Обединетите нации објавија дека Газа страда од глад и дека ова е директен резултат на „систематското опструкција“ на помошта за Газа од страна на Израел. Израел го нарече извештајот „целосна лага“.
Според Министерството за здравство управувано од Хамас, најмалку 64.522 лица се убиени во израелските напади врз Газа.