Кордаз (Кротоне), Бериша (Аталанта), Вивијано (Сампдорија), Карнезис (Удинезе), Сторари (Калјари), Гореш (Израел). Ова се дел од голманите што капитулираа пред Илија Несторовски во оваа сезона. Но, не е и комплетната листа на „жртви“ на напаѓачот на Палермо и на фудбалската селекција на Македонија. Највредните што вадеа топка од сопствената мрежа беа Буфон и Донарума, првиот докажан и во заминување, вториот допрва треба да се докажува и наметнува. Она што е заедничко за двајцата е статусот на репрезентативци на Италија што го имаат, двајцата се Џанлуиџи, двајцата беа совладани во рамки на месечен период.
„Нестогол“ како што популарно го нарекуваат на Сицилија е во неверојатна гол низа. За кратко време стана омилен лик на „Ренцо Барбера“, а два меча му беа потребни и на „Телеком арена“ во Скопје и во него да се гледа како на потенцијален иден лидер на националниот тим. За сицилијанците постигна шест гола од деветте колку што има целата екипа во изминатите 13 кола во Серија А. Или, ако бодовите се поместат во преден план, тогаш пет од шесте колку што брои екипата се освоени по негови реализации и уште по третина од првенството го навлече вниманието врз себе и неколкукратно ја зголеми сопствената цена на пазарот.
Во овој контекст и прашањето – може ли Несторовски да се претстави и пред Реина или Де Хеа, сеедно, во сабота во Гранада во мечот на Македонија против Шпанија во цилусот на квалификации за светското првенство во Русија во 2018 година? – Неговите голови против Израелците и „азурите“ не беа доволни за тимот да излезе од нултата позиција на табелата, но и тоа како се причина за негување надежи дека „Нестогол“ може да „пукне“ и на „Лос Карменес“ против „црвената фурија“.
Албанија, Израел и Италија нè казнија, но тоа не смее да нè поколеба
„Против Шпанија е тешко да се игра пресинг или да се напаѓа како го правеве тоа во дуелите со Израел и со Италија. Меѓутоа мора да истраеме и да продолжиме на начин на кој игравме и досега. Фудбалот нè казни против Албанија, Израел и Италија што не смее да нè поколеба. Мора да дадеме максимум и да оставиме добар впечаток, мора да бидеме на највисоко ниво“, коментира Несторовски за време на подготовките на репрезентацијата во Скопје.
Македонија денеска одработи два тренинга на тренинг комлексот „Петар Милошевски“ при ФФМ. На болки во задната ложа на десната нога се пожали капитенот Горан Пандев, па работеше со намалено темпо и индивидуално со асистентите на селекторот Ангеловски во стручниот штаб. Последните информации велат дека повредата не е сериозна и капитенот ќе биде подготвен за настап во Гранада. Репрезентацијата за Шпанија заминува задутре.