Земање на брисеви во Општината и без епидемиолошка анкета се дел од нотираните прекршувања на ковид-19 процедурите, изјави Иринка Сотирова-Бухова, директорка на Државниот здравствен и санитарен инспекторат (ДЗСИ) на денешната прес-конференција. Притоа истакна се направени два инспекциски надзора и тоа на 17 април на Центарот за јавно здравје во Куманово и на 24 април пришто биле опфатени Центарот за јавно здравје, Службата за итна помош во рамки на Здравствениот дом во Куманово, матичните лекари на пациентите и во три лаборатории во Скопје кои извршиле тестирања.
„Првиот инспекциски надзор е извршен на 17 април во Центарот за јавно здравје во Куманово. Првото тестирање било извршено на 26 март со земање на брисеви на лица од Кризниот штаб. Тестирани биле 28 лица и биле добиени 28 негативни резултати. На 12 април биле земени 38 бриса од кои пет биле позитивни, по што биле издадени решенија за 37 контакти. Тука се утврдени недостатоци, односно и првото и второто тестирање се без спроведена епидимиолошка анкета. Земени се како скенирање, по одлука на епидемиолог, што е прекршување, бидејќи не е со дозвола на министер, рече Бухова.
Вториот прекршок, според Бухова, се однесува на тоа што брисевите биле земени во простори на Општина Куманово што се коси со ковид-19 протоколот, бидејќи истите треба да бидат обезбедени во Центарот за јавно здравје.
„Вториот прекршок се однесува што брисевите се земени во просториите во Општината, што е сосема спротивно на протоколите. Морало да биде во просториите на Центарот на јавното здравје. Во службата за Итна помош имало пропусти при евиденцијата. Во службата на општата болница Куманово, лицето М.Д. и уште едно лице биле заведени како итни случаи и бил даден итен упат за инфективната болница во Скопје. Лицата за кои на 16 април е издадено решение за домашно лекување не постапиле по решението. Тоа е казниво, за што ќе се изрече прекршочен прекршок од 300 до 600 евра. Вториот прекршок се однесува на неправилна евиденција во службата за итна медицинска помош. Таму е во тек вонреден стручен надзор“, истакна Бухова.