Стотици етнички Срби изминатиот викенд подигнаа барикади на пат во северно Косово, блокирајќи го сообраќајот преку двата главни гранични премини кон Србија, соопшти полицијата.
За блокадите беа користени камиони, амбулантни возила и земјоделска механизација, што ги продлабочи неодамнешните тензии кои вклучија експлозии, престрелки и вооружен напад врз полициска патрола во која беше повреден полицаец етнички Албанец. Демонстрантите изјавија за АФП дека се огорчени од апсењето на поранешен полицаец од етнички Срби, осомничен за вмешаност во неодамнешните напади врз косовската полиција.
Косовскиот премиер Албин Курти рече дека Приштина не сака конфликт, но на „агресијата“ ќе одговори со сета сила што и е на располагање. Вака тој реагираше на изјавата на српскиот претседател Александар Вучиќ дека Србија ќе побара од КФОР да распореди свои воени и полициски сили на Косово. Според Курти, секое неосудување од страна на ЕУ и САД на „режираното насилство“ ќе „го поттикне официјален Белград дополнително да промовира дестабилизација“. Според Курти, Србија веќе неколку дена „му се заканува на Косово со агресија“ и повикува на враќање на српската војска на Косово повикувајќи се на резолуцијата 1244 на ОН. Тој побара од КФОР да ги отстрани барикадите подигнати од етничките Срби.
Борците од косовските специјалци зазедоа објект кај браната Газиводе, од каде ги симнаа српските знамиња и ги отстранија српските чувари. Тоа е главниот извор на вода за хидроцентралата лоцирана таму, при што поголемиот дел од езерото се наоѓа во општина Зубин Поток населена со претежно српско население, како и три други области во северниот дел на регионот.
Српскиот претседател Александар Вучиќ одржа состанок со неговиот Совет за национална безбедност во време кога тензиите меѓу властите и етничките Срби нагло се зголемија на Косово. Во саботата беше фрлена шок-бомба врз полицијата на ЕУ во северно Косово, со мнозинство српско население, а локалната полиција се вклучи во престрелка со непознати групи.
НАТО, кој има мировни трупи во Косово, ги повика двете страни да избегнуваат провокации. ЕУ го направи истото, предупредувајќи дека нема да толерира напади врз полицијата на ЕУ или криминални дејствија.
Во интервју за Ројтерс по состанокот со Советот за национална безбедност, Александар Вучиќ изјави дека сака да ја смири ситуацијата. Тој повтори дека употребата на полицијата од страна на приштинските власти е во спротивност со претходните мировни договори. „Се надевам дека имаме гаранции од КФОР, од Европа, дека нема да бидат преземени насилни дејствија против демонстрантите на Косово. Се надеваме дека се ќе биде направено на мирен начин. Постојано разговараме со нив, тоа е наша работа. Ќе направиме се за да ги зачуваме мирот и стабилноста“, изјави Вучиќ за српските медиуми.
Извор: АФП/БГНЕС