Фудбалската репрезентација на Алжир по вторпат во историјата завладеа со африканскиот континент. Алжирците во финалето на турнирот во Египет го совладаа Сенегал со 1:0 и го повторија успехот од 1990 година за невидена еуфорија во земјата, но и во Франција.
Алжирскиот успех на Купот на африкански нации (КАН) значеше и полни раце работи за француската жандармерија. Неколку илјади навивачи на популарните „пустински лисици“ се собраа пред Триумфалната порта во Париз, како и во неколку други градови низ целата земја, на прослава на шампионската титула.
Илјадници луѓе се собраа и на Шанзелизе, област што беше обезбедувана од околу 2.500 полицајци. Околу еден часот по полноќ, во близина на Шанзелизе, навивачките групи ја испровоцираа полицијата која на употребата на пиротехнички средства и фрлање на стаклени шишиња и камења возврати со солзавец и за кратко време ја стабилизира ситуацијата.
Во текот на ноќта во Париз беа уапсени 102 лица од кои, според извештајот на Министерството за внатрешни работи, 86 завршија во притвор. Француските власти наведуваат дека низ целата земја биле уапсени 198 лица од кои 177 останале во притвор.
Најголемата прослава во Франција на успехот на КАН беше во Марсеј, каде се проценува дека на улиците излегле околу 25.000 Алжирци.