На предлог на техничкиот премиер Емил Димитриев, со мнозинство гласови Собранието изгласа Диме Спасов и Митко Чавков повторно да се вратат на функциите министер за труд и социјална политика односно министер за внатрешни работи.
– Моја законска обврска е да предложам министри, со оглед на тоа што беа констатирани оставките на министерот Оливер Спасовски и министерката Фросина Ременски. Со одлуката на Уставниот суд и гласањето на предлогот за измени во Изборниот законик, имаме нова ситуација без точен датум за избори и затоа ги предлагам Диме Спасов и Митко Чавков за министри. Се работи за сериозни луѓе и зад нив стои богато искуство, рече Димитриев.
На ова реагираше опозицискиот пратеник Горан Милевски, кој упати прашање до Димитриев дека, ако важат одлуките за оставки на министрите од СДСМ во новонастанатата ситуација, зошто Димитриев се уште е премиер.
По ова, пратениците од опозицијата откако гласаа Против, кои на себе носеа беџови со стисната тупаница, ја напуштија седницата.
Инаку претходно, со 101 глас За, присутните пратеници едногласно ја изгласаа предлог-измената во Изборниот законик, поднесена од Талат Џафери. Со ваквата измена се предвидува укинување на членот 82 и 83 од Изборниот законик, односно бришење на датумот 5.јуни како фиксиран за избори и повлекување на обврските на медиумите во предизборна и изборна кампања.
Измените во Изборниот законик во моментов се на разгледување во Законодавно-правната комисија на Собранието, по што за конечно гласање, Велјаноски закажа седница во 18 часот. Пратениците од ДПА не присуствуваат на седницата.