Поранешниот министер за внатрешни работи и директор на Бирото за јавна безбедност, Митко Чавков излегува од притвор, откако судот му ја прифатил понудената гаранција во недвижен имот.
Кривичниот суд во Скопје денеска соопшти дека го прифатил предлогот на обраната на Чавков притворот да му се замени со гаранција.
Чавков е еден од 28 обвинети за терористичко загрозување на уставниот поредок и безбедноста во врска со насилствата во Собранието од 27 април, минатата година.
„Кривичниот совет на одделението за гонење организиран криминал и корупција при Основниот суд Скопје 1 – Скопје, постапувајќи по предлог на одбраната на М.Ч. опфатен во обвинителниот акт поврзан со настаните од 27 април 2017 година, во Собранието на Р.Македонија, донесе решение со кое го прифати предлогот за определување мерка за обезбедување присуство – гаранција во недвижен имот со кое по правосилноста на решението и запишување на гаранцијата, мерката притвор ќе се укине“, стои во соопштението на судот.
Во меѓувреме заради обезбедување на присуство во текот на постапката на Чавков му се определуваат мерки за претпазливост, односно привремено одземање на пасошот и еднаш неделно да се јавува во судот.
Чавков и претходно бараше да му се замени притворот со гаранција, но Апелацискиот суд го одби предлогот поради некомплетна документација.
Mинатата недела судот ги прифати гаранциите и на Горан Ѓошевски. поранешниот шеф на обезбедување на Трајко Вељаноски и Оливер Поповски од МВР, кои исто така беа во притвор како обвинети за „крвавиот четврток“.
Чавков, Ѓошевски, Поповски и нивниот колега од МВР, Душко Лазаров во „Шутка“, на 28 март, еден ден по поднесувањето на обвинението за „крвавиот четврток“ беа вратени во „Шутка, откако претходно Врховниот суд, одлучувајќи по нивните жалби им одреди куќен притвор.