Горан Ѓошевски. поранешниот шеф на обезбедување на Трајко Вељаноски и Оливер Поповски од МВР, обвинети за насилствата во Собранието од 27 април, лани излегуваат од притвор, откако Кривичниот суд во Скопје ги прифатил нивните барања мерката притвор да им биде заменета со друга мерка – гаранција.
Од притвор излегува и обвинетиот Захарие Симовски, на кого судот му одредил куќен притвор.
„Кривичниот совет донесе решенија со кои за обвинетите Г.Ѓ. и О.П. го прифати предлогот за определување мерка за обезбедување присуство – гаранција, со кои по правосилноста на решенијата и запишување на гаранцијата, мерката притвор ќе се укине, а заради обезбедување на присуство во текот на постапката им се определуваат и мерки за претпазливост. Додека за обвинетиот З.С. се прифаќа предлогот за укинување на мерката притвор и се определува мерка куќен притвор“, стои во соопштението од судот.
Ѓошевски и Поповски, заедно со поранешниот министер за внатрешни работи, Митко Чавков и нивниот колега од МВР, Душко Лазаров на 28 март, еден ден по поднесувањето на обвинението за „крвавиот четврток“ беа вратени во „Шутка, откако претходно Врховниот суд, одлучувајќи по нивните жалби им одреди куќен притвор.
Чавков и Лазаров и натаму остануваат во притвор.
Основното јавно обвинителство за гонење на организиран криминал и корупција на 27 март, поднесе обвинение за насилствата во Собранието. Од нив 28 се товарат за кривичното дело терористичко загрозување на уставниот поредок и безбедноста, а две лица се гонат за помагање.