Скап цех плати Металург во триумфот против Татран Прешов во групата Ц во Лигата на шампиони во ракомет. Тимот од Автокоманда го совлада словачкиот состав со убедливи 26:2о и со половичен ефект (4 победи и 4 порази) се вивна на третата позиција на табелата, веднаш зад Монпелје и Ла Риоха. Но, она што фрли дамка на конечниот резултат на металурзи е скршеницата на раката со која шутира Филип Кузмановски уште во воведната минута од средбата.

Македонскиот репрезентативец, со солзи во очите, веднаш беше превезен во болница каде доби гипс, а по третманот се врати во ВИП арена „Борис Трајковски“ да ги бодри своите соиграчи. Тие му возвратија на најдобар можен начин, одиграа за него за барем мало ублажување на болката што ја чувствува. Тренерот Лино Червар по мечот призна дека ситуацијата со Кузмановски е голе хендикеп и за Металург и за националниот тим што во јануари го очеккува настап на светското првенство.

„Честитки до моите момчиња кои и покрај шокот на почеток на средбата успеаја да победат. Затоа ми доаѓа да се радувам, но од друга страна ми се плаче за Кузмановски. Неговата повреда е голем хендикеп и за клубот и за репрезентацијата. Штета што овој триумф беше без него. Искрено се надевам дека Господ ќе се смилува, дека брзо ќе закрепне и ќе биде на располагање на репрезентацијата“, рече Червар по средбата.

Талески повторно беше во елемент. Постигна 10 гола против екипата од Прешов и заврши како најефикасен поединец на мечот, Гуглета и Обрадовиќ по пет пати се запишуваа во листата на стрелци. Предводник на поразената екипа беше Рабек со шест погодоци. Во наредното коло, последно за 2016 година, Металург ќе гостува на Ла Риоха на 3 декември (сабота).

Металург – Татран Прешов 26:20 (11:10)

ВИП арена „Борис Траовски“: Гледачи: 3.500. Судии: Радојко Бркиќ (Австрија) и Андреј Јусуфхоџиќ (Австрија).

Металург: Арсиќ, Томовски, Дупјачанец, Петров, Дрогришки 1, Костески, Обрадовиќ 5, Кузмановски, Илиќ 3, Печенковски, Талески 10, Велковски, Пешевски 2, Палевски, Гуглета 5, Арсеновски. Тренер: Лино Червар.

Седмерци: 1/4. Исклучувања: 4 минути

Татран Прешов: Бражник, Чарапкин, Рабек 6, М. Сарпатаки, Хуменански, Хрстка 2, Крок 2, Садовиј, Л. Сарпатаки, Урбан 1, Пешков 3, Вучко 3, Јанковиќ, Палес, Чуприна 2. Тренер: Растислав Тртик.

Седмерци: 1/1. Исклучувања: 6 минути