Петтиот бран на пандемијата на коронавирус во Јапонија исчезна, речиси, преку ноќ, што оправдано предизвика чудење кај многу научници. Некои од нив мислат дека делта сојот мутирал до ниво на сопствено уништување.

Четвртиот бран во Јапонија кулминира во август со повеќе од 23.000 случаи на ден, а тие бројки од неодамна се околу 170. Значителниот пад многумина го припишуваат на високата стапка на вакцинација и прифаќањето на јавноста дека мора да се носат маски. Истражувањата покажуваат дека повеќе луѓе во Азија го имаат ензимот APOBEC3A, кој ги напаѓа РНК вирусите, вклучително и ковид-19, во споредба со други луѓе во Европа и во Азија.

Тим од генетичари од Националниот институт за генетика и од Универзитетот во Ниигата започнаа да истражуваат како APOBEC3A влијае на протеинот nsp14 кој се наоѓа во коронавирусот и колку може да влијае на неговите активности. Тимот направи анализа на соевите што се насобраа во периодот од јули до октомври годинава, при што се покажаа две работи – голема генетска разновидност на соевите, како и фактот дека мутациите достигнале одредена точка на нивниот развој и застанале таму.

– Бевме шокирани од она што го откривме. Делта сојот на коронавирус во Јапонија е многу заразен, што пак го спречува развојот на други соеви. Но, како што почнаа да се акумулираат мутациите, веруваме дека дошло до грешка во вирусот што повеќе не можеше да прави свои копии. Бидејќи нема зголемување на нови случаи, веруваме дека во еден момент од неговата мутација, вирусот се придвижи кон самоуништување, рече Итуро Инуе, генетичар во Националниот институт за генетика за „Јапан тајмс“.

Иновативна теорија би можела да објасни зошто бројот на новозаразени во Јапонија е толку мал, додека другите земји бележат значителен пораст на нови случаи. Теоријата на Иноу, исто така, може да објасни што се случи со САРС во 2003 година, чиешто ширење престана самостојно.

Познатиот научник истакнува дека во јапонската делта моментно доминираат соеви кои доаѓаат однадвор, но доколку успее да се уништи себеси, тоа би значело дека има простор за други, потенцијално поопасни соеви кои доаѓаат од други земји. Тој ја истакна важноста на карантинот пред да влезе во Јапонија.

Запрашан дали вакво нешто може да се случи и во други земји, тој рече дека „шансите за тоа не се нула, но изгледа премногу оптимистички бидејќи не успеавме да дојдеме до докази кои би го потврдиле тоа“.