Без налог од Основното Јавно Обвинителство (ОЈО), службеници на Министерството за внатрешни работи (МВР) не може да влезат на семејни веселби во приватни домови, истакна Наќе Чулев за време на денешната посета на Битола.
„За одредени такви случаи, ОЈО ни дава такви налози, а во други не ни издава“, појасни Чулев во одговор на прашање какви мерки презема МВР со оглед на ширењето на коронавирусот на семејни прослави.
Министерот за внатрешни работи притоа апелира до граѓаните да ги почитуваат мерките и препораките на Владата и повика на совесно однесување.
„Кога не може веднаш да се дејствува, најпрво се препознавање на лицата. Потоа се повикуваат во полициска станица и им се поднесува соодветен поднесок до Јавното обвинителство. Но, неопходно е граѓаните сами да бидат свесни и да носат заштита опрема оти, претпоставувам, дека со доаѓање на изборите, тие мерки ќе бидат уште полабави. Најверојатно и границите ќе се отворат од наредната недела, па граѓаните сами треба да бидат свесни за ризикот од заразата“, дополни Чулев.