Во јапонскиот град Нагасаки се одбележува 75 годишнина од американското нуклеарно бомбардирање во Втората светска војна. Градоначалникот на Нагасаки и преживеаните од тој трагичен настан апелираа до светските лидери за поголеми заложби за забрани на нуклеарното оружје ширум светот.

Точно во 11.02 часот по локално време, момент кога американскиот бомбардер „Б-29“ ја исфрли атомска бомба врз Нагасаки пред 75 години, преживеаните и бројни гости им оддадоа почит на сите жртви со минута молчење.

Бомбардирањето на Нагасаки на 9 август однесе 70.000 човечки животи, а само три дена пред тоа, првата атомска бомба беше фрлена и на Хирошима при што загинаа дури 140.000 лица. Шест дена подоцна, на 15 август во 1945 година, Јапонија потпиша капитулација со што заврши Втората светска војна. Многу преживеани настрадаа од карцином и други болести затоа што беа изложени на радијација и лоши услови за живот во разурната, повоена Јапонија.

Градоначалникот на Нагасаки, Томихиза Тау, прочита мировна декларација во која изрази загриженост за нуклеарната закана. Тој, исто така, побара од Владата на Јапонија итно да се приклучи на договорот за забрана на нуклеарно оружје, оценувајќи дека светот е во поголема опасност од нуклеарен конфликт.