Американски претставници набрзо поактивно ќе се вклучат во дијалогот „Белград – Приштина“ со водење на т.н. „шатл дипломатија“, разговари со највисоките српски и косовски претставници, посети во двата града и „насочување на текот на преговори“, објави денеска белградскиот дневен весник „Данас“ повикувајќи се на неименувани извори во Вашингтон.
Весникот наведува дека американските претставници ќе се ангажираат во српско-косовскиот проблем по завршување на референдумот во Македонија на 30 септември.
„Целта на САД е преку шатл дипломатија да се приближат ставовите на Белград и на Приштина со цел да се дојде до рамковен текст на договорот за Косово, а финалниот договор да може да биде потпишан на пролет следната година. Се очекува дотогаш и српскиот претседател Александар Вучиќ и косовскиот претседател Хашим Тачи да успеат да обезбедат целосна поддршка од своите влади и парламенти како и создавање клима за поддршка на разграничувањето и на финалниот договор во српската и во косовската јавност“, истакна неименуван дипломат за „Данас“.
Весникот потенцира дека САД преземаат обврска да обезбедат поддршка од сите клучни западни сојузници за идниот договор, пред се од Германија, од Велика Британија и од Франција.
Но, и покрај поактивното вклучување на САД во дијалогот „Белград – Приштина“, Брисел официјално останува посредник во преговорите, наведува „Данас“.