Снимките и фотографиите на МВР направени од полициски службеници во цивилка за време на протестите не може да се користат како докази, затоа што се направени без наредба за посебни истражни мерки, а службениците не биле легитимирани, вели адвокатот Ѕвонко Давидовиќ, кој е застапник на две демонстрантки на Шарената револуција кои утрово беа повикани на распит во полициската станица Беко.
Две од вкупно четири демонстрантки Ана Кркуљ и Ирена Штеријовска се повикани со образложение дека сториле повеќе кривични дела за време на протестите на Шарената револуција врз основа на снимките, за што Давидовиќ како нивен застапник вели дека доколку тоа се искористи како доказ, тие ќе поднесат кривична пријава против министерот Чавков, командирот и инспекторите, поради злоупотреба на службената положба.
-По Законот за јавна чистота никогаш нашите клиенти не биле сопрени од униформиран полициски службеник, нивните цивилки не вредат ништо по закон и ако не е легитимирано од униформиран службеник или комунален инспектор, прекршокот не е констатиран. Полицијата тоа го разбра и платните налози не ги издаде. Фотографиите не може да се користат како докази, затоа што наредба за посебни истражни мерки за вакви кривични дела нема, а она што го користи полицијата не е валиден доказ, затоа што е неовластено снимање.
Укажавме дека доколку ги применат фотографиите како докази ќе им поднесеме кривични пријави за злоупотреба на службена положба против министерот, директорот, командирот и инспекторите. Не може да докажат дека на тоа место во тоа време е извршен прекршокот. Едноставно се разделивме без никаков записник, вели Давидовиќ.
Денеска на распит во полициската станица беа повикани и директорката на Хелсиншкиот Комитет за човекови права во Македонија Уранија Пировска и професорката Мирјана Најчевска.
Најчевска го бојкотираше распитот и истури боја врз станицата, додека на нејзиниот адвокат му било соопштено дека таа е казнета со парична казна од 50 евра или општо корисна работа. Истата казна ја доби и Пировска.
-Јас ќе испратам писмо до Министерството за култура да ми се признае авторство на сето боење на „Скопје 2014“ затоа што не ме прашаа кога го правеа и ова е мој акт на разубабување на просторот во кој живеам. Немам намера да платам, да служам каков било општокорисен труд, можеби ќе ме аболицира Претседателот на државата, рече Најчевска.
– Морам да кажам дека на полициските службеници им беше исклучително незгодно од разговорот што се водеше и се трудеа да заврши за што пократко време. И понатаму ќе продолжам да протестирам и не мислам дека со вакви методи на заплашување ќе се спречат граѓаните да излегуваат на протести. Сакам да посетам дека нашите соборци Здравко Савевски и Владимир Куновски се во куќен притвор – тие се манирите, тоа е методот на оваа власт. Луѓето не смеат да бидат обесхрабрени, мора да продолжиме секој ден во 18 часот пред СЈО – до крај, рече Пировска.
Демонстрантите кои денеска беа повикани на распит, пред Беко се појавија придружувани од поддржувачите на Шарената револуција кои реквизитите за боење ги оставија во паркот пред станицата.
Се случи и обид за контра – протест, кога малолетници се појавија со транпаренти „Народот не е глуп, Најчевска е хулиган“ и „Народот не е цепаница“. По кратка вербална расправија, малолетниците го напуштија местото, а еден од транспарентите кој заврши во рацете на „шарените“ беше исфарбан.
Негодувања за протестот на Шарената револуција пред полициската станица Беко имаше и од дел од локалните жители, додека просторот беше опкружен со кордон од полицајци.
Повикувањето на демонстрантите на распит поради учество и прекршоци сторени на протестите, се случува во повеќе наврати од почетокот на Шарената револуција.
Претходно и професорот Гордан Калајџиев беше казнет со 50 евра поради фрлање на боја за време на протест. Досега на тројца демонстранти им се изречени условни казни, додека на двајца – Здравко Савевски и Владимир Куновски осомничени за демолирање на Народната канцеларија на Иванов закажено е судење на 31. мај, а тие се во куќен притвор и не го признаваат делото.