Студенти и граѓанит кои го блокираа влезот во зградата на Вишиот суд во Нови Сад во претходните пет дена, привремено ја отстранија утрово блокадата за да може судот да донесе одлука по жалбата за продолжување на притворот на активисти и студенти кои се лишени од слобода повеќе од два месеци поради наводен обид за уривање на уставниот поредок.
Утрово отстранета е металната ограда поставена пред главниот влез по што во Судот влегоа вработени и пред зградата во моментов се наоѓаат студенти и мал број граѓани.
Судот вчера соопшти дека поради блокадата, не се во можност да постапуваат за случајот, како и со жалбите против одлуките во текот на таа постапка, и дека работата на сите судски органи во зградата е „целосно оневозможена“.
Петмина притворени активисти се во затвор во Нови Сад, додека професорката Марија Васиќ е префрлена во затворската болница на Централниот затвор во Белград кон крајот на минатата недела, поради лоша здравствена состојба поради нејзин штрајк со глад.
Во врска со случајот на Марија Васиќ и апсењето на активистите, Европската комисија објави дека е „длабоко загрижена“ за влошувањето на здравјето на професорката која е во притвор и штрајкува со глад.
Активистите од Нови Сад, Младен Цвијетиќ, Срѓан Ѓуриќ, Лазар Диниќ, Ладо Јововиќ, Давор Стефановиќ и Марија Васиќ беа уапсени на 14 март, ден пред масовниот протест во Белград, под обвинение дека подготвувале акт против уставниот поредок и безбедноста на Србија.