Тениската репрезентација на Аргентина е десетта по 1972 година што ја завршува одбраната на титулата во Дејвис купот уште во првото коло. „Гаучосите“ во првото коло се елиминирани од Италија со 3:2 по денешната победа на Фабио Фоњини над Гвидо Пелја со 2:6, 4:6, 6:3, 6:4, 6:2.

Последниот меч од дуелот во Буенос Аирес, единствен што се играше на земјена подлога во осминафиналето, беше одложен за 24 часа поради временски неприлики во аргентинската престолнина.

Италија по првиот натпреварувачки ден имаше водство со 2:0. Аргентина намали во натпреварот во двојки и израмни по првиот сингл меч во завршниот ден, но сили за пресврт немаше.

Италија во четврт-финалето (7-9 април) ќе игра против Белгија. Останатите двојки се: Србија – Шпанија, Австралија – САД и Франција – Велика Британија.