Две години беше асистент на Раул Гонзалез во РК Вардар. Во вториот дел од ланската сезона беше асистент во стручниот штаб на Индира Кастратовиќ со која го предводеа ЖРК Вардар и на завршниот турнир во Лигата на шампиони. Давид Дејвис од денеска е назначен за прв тренер на женскиот ракометен првак на Македонија што ќе биде негов прв самостоен ангажман во кариерата.
„Работа има, ќе одиме чекор по чекор. Му благодарам на Серге Самосоненко за довербата што ми е укажана. Очекувам да продолжиме каде што застанавме лани. Имаме нови ракометарки кои го засилија тимот и затоа верувам дека ќе бидеме уште подобри. Потребно е само време да се вратиме во форма по паузата од четири месеци што ја имавме“, рече Дејвис на промоцијата.
Токму пласман на Фајналфор со ЖРК Вардар е приоритет што е поставен пред него. Дејвис, доколку има време и му дозволат обврските со ракометарките, останува на располагање да асистира и на Гонзалез во машката екипа. На клупата на вардарки ќе дебитира утре попладне во шампионскиот дуел против Астраханочка на домашен терен.
„Астраханочка е млада екипа што игра груб ракомет. Квалитетот, сепак, е на наша страна. Дома мора да победуваме и не само на овој меч што нè очекува туку и на секој нареден. Благодарност и со Раул Гонзалез за сета помош и поддршка. Се познаваме 18 години, прво како ракометари, потоа тој стана тренер, а јас него асистнт кога ја завршив кариерата“, дополни Дејвис чиј асистент во работата ќе биде Ацо Станковски.
Дејвис во кариерата настапуваше за шпанските клубови Гранолјерс, Овиедо, Теукро, Алтеа, Валјадолид, Сиудад Реал, Атлетико Мадрид и Порто во Португалија. Беше и репрезентативец на Шпанија со која се закити со бронзен медал на олимписките игри во Пекинг во 2008 година.