Бришење на името ВМРО од опозициската ДПМНЕ и негова законска заштита и забрана за користење од било која политичка партија, фирма или невладина организација поради негова злоупотреба во дневно-политички цели. Ова е само дел од определбите на „Левица“ во нејзината програма за изборите што се одржаа на 15 јули, вклучена во сферата политички плурализам и изборен систем. Заложба на партијата која освои два пратенички мандата е организирање на Македонија како една изборна единица, забрана за предизборни коалиции, како и на монолитни и чисто етнички партии туку само на идеолошки профилирани.
Оние кои немале прилика да ја прочитаат програмата на Левица во предизборниот период или да присуствуваат на некоја од средбите со граѓани што ги имаше партијата во периодот на кампања и да ги слушнат определбите од нејзините членови, можеби и ќе се изненадат од содржинските делови на читанката, особено ако го заокружиле бројот 4 на гласачкото ливче.
Во изборната програма, во делот посветен на Политичкиот систем и администрацијата, Левица ветува
„поништување на т.н. Преспански договор и бришење на погрдниот назив „Северна“ од Уставот. Укинување на Охридскиот рамковен договор како извор на консоцијалниот (сегрегирачки) етничко-трибалистички карактер на политичкиот систем на Македонија и враќање на чисто мнозинскиот карактер, со практикување на демократијата како стандард за современите демократски заедници“
Преспанскиот договор Левица го третира и во делот за надворешната политика.
„Поништување на т.н. Преспански договор со Грција и на криминалните илегални уставни амандмани произлезени од истиот (поради непочитување на правото на самоопределување); Ревидирање на Договорот за добрососедство со Бугарија, поради историски ревизионизам и рехабилитација на фашизмот; Отповикување на признавањето на Косово, Израел и Јужна Кореја; Издигнување на билатералните односи со НР Кина на ниво на стратешко партнерство, со фокус на инфраструктурно поврзување; Признавање на независноста на Палестина, Каталонија и Баскија“, се вели во дел од програмата на „Левица“.
Во делот од програмата, посветен на Меѓународните односи и организации, Левица се залага за „Итно отчленување од НАТО- пактот, поради непочитување на уставната процедура за влез во воен „сојуз“ со други држави, како и непочитување на волјата на народот изразена на Референдумот од 2018 година“.
Левица се залага за „поддршка на зачленувањето на Македонија во Европската унија, со инсистирање во процесот на преговори Македонија да биде индивидуално вреднувана без ставање во пакет со други земји”.
Но, она што ја оддалечува оваа партија од можноста за евентуално коалицирање со партии од албанскиот блок, се уште неколку изборни заложби:
„Поништување на двојазичноста, како резултат на октроираната т.н. Тиранска платформа, и враќање на јазичните права на малцинствата во рамки на Уставот; укинување на „правичната застапеност“ и позитивната дискриминација по етничка основа и нејзина замена со позитивна дискриминација по социјална основа“
Дополнително, во делот од програмата посветен за Обвинителство, Левица ветува „процесуирање на незастарливите т.н. Хашки случаи од 2001 година („Мавровски работници“, „Водството на ОНА“ и др.), како најтешки кривични дела извршени против човечноста и меѓународното хуманитарно право, како и „кривичен прогон против сите учесници во илегалната и шверцерска промена на уставното име Република Македонија (премиер, министер за надворешни работи, пратеници, обвинители, судии, новинари, активисти и др.)“.