Ништо сè уште не е готово кога е епидемијата во прашање, може да очекуваме четврти бран на коронавирусот наесен. Делта сојот се шири многу побрзо од алфа сојот, па може да го преземе водството во Европа и ќе се шири меѓу невакцинираната и ризичната популација. Со примена вакцина се исклучува можноста за тежок тек на болеста, предупредуваат инфектолози и епидемиолози од земјата и регионот.
Алемка Маркотиќ, директорка на Клиниката за заразни болести „Др. Фран Михаљевиќ“ во Загреб за „ХТВ“ изјави:
– Може да очекуваме четврти бран на коронавирусот наесен. Делта сојот се шири многу побрзо од алфа сојот. За очекување е дека тој може да го преземе водството во Европа за два дена и дека ќе се шири меѓу невакцинираната и ризичната популација, што ќе резултира со голем број хоспитализирани и починати, ако луѓето не ја разберат посериозно вакцинацијата, изјави д-р Маркотиќ.
Таа посочи дека наскоро може да се очекува дека делта сојот ќе се прошири во Хрватска.
– Минатата година беа потребни околу два месеци за да се прошири алфа-вирусот. Моравме да ја завршиме сезоната околу 15 август, а овој сој би можел да го направи тоа порано. Минатата година имавме помлади кои имаа полесна форма на болеста. Сето ова беше сфатено како лесна болест. Она што можеме да го очекуваме е брза експанзија, сè уште не со висок процент во Европа. Сите институции го следат ширењето и ги предупредуваат луѓето да не се опуштаат, рече таа.
Епидемиолог Предраг Кон денеска за телевизијата Н1 изјавил – што се однесува до епидемијата на коронавирусот “ништо сè уште не е готово”.
Тој нагласил дека можеме да кажеме дека сме во мирна ситуација којашто ќе биде во текот на летото, но со вакво опуштено однесување, можно е болеста во поголеми размери да се врати наесен.
И проф. д-р Александар Петличковски од Институтот за имунобиологија и хумана генетика, на завчерашната трибина „Вакцинација и предизвици со Ковид-19, предупреди:
– Тоа што во моментов имаме ниски бројки на заразени, не е доказ дека пандемијата е завршена. Во одредени земји кадешто има голем процент на покриеност со имунизација, вирусот има повторни обиди да се врати, можеби не со иста сила, но факт е дека со примена вакцина се исклучува можноста за тежок тек на болеста, рече тој и потсети дека имаме вакцини на располагање.
– Сите вакцини коишто се одобрени од СЗО и другите авторитети во огромен процент што некогаш се движи до 100 отсто, штитат од тежок тек на болеста и тие се основните податоци што мора да ги имаме на ум кога размислуваме за тоа дали да се вакцинираме или не – изјави д-р Петличковски.
И на Косово се регистрирани двајца заболени со делта сојот на коронавирусот, објави денеска косовското Министерство за здравство.
(Љ.Б.)