На владина седница на 14 јануари беше одлучено ЕСМ привремено да го преземе управувањето со БЕГ по опасноста што се закануваше на скопјани да останат со ладни радијатори среде грејна сезона. Официјално преземање се случи на 21 јануари, а ден претходно БЕГ, како што објави ТВ 21, склучила договор за набавка на 52,1 милиони литри мазут во вредност од 40 милиони евра со компанијата РКМ на бизнисменот Ратко Капушевски.
Како што објави телевизијата, „договорот е постигнат преку рамковна спогодба на 20 јануари годинава по цена од 39,26 денари за килограм мазут и постигнат е без објавување на оглас“.
По донесената Одлука од Владата на Северна Македонија и одобрување на текстот на договорите, АД ЕСМ од 22 јануари 2022 година влезе во привремено управување на Друштвото за производство на топлинска енергија Балкан енерџи ДООЕЛ Скопје и на Друштвото за снабдување со пареа и топла вода
АД Скопје Север во стечај.
„АД ЕСМ потпиша три договори за деловно-техничка соработка со трите правни субјекти на „Балкан Енерџи“, (Производство, Дистрибуција и Снабдување). Договорот предвидува влегување на АД ЕСМ во раководењето на „Балкан енерџи ДООЕЛ Скопје“ преку назначување прокуристи, лица вработени во АД ЕСМ, чиј потпис ќе биде врзан со потписот на управителите на друштвото Балкан енерџи. Сите одлуки, договори и плаќања ќе се реализираат со два потписа, односно без согласност на прокуристот од АД ЕСМ, „Балкан енерџи“ нема да смее да врши исплати и да склучува договори“, се наведува во денешното соопштение на ЕСМ.