Самитот ЕУ – Западен Балкан е топ тема во денешниот ден. Настанот првично беше планиран да се одржи во Загреб, но поради пандемијата од коронавирусот, сепак, ќе оди преку видео-конференциска врска. Меѓу учесниците и македонска делегација предводена од премиерот Оливер Спасовски. Фокус сфери, според дневниот ред, се соработката во борбата за спречување на ковид-19 и последиците од вирусот, европската перспектива на земјите од регионот на Западен Балкан, но и нивната посветеност на реформите и европските вредности.
Кои се фокус точки на Самитот?
На Самитот ќе биде нагласено значењето на уникатните односи на Европската Унија (ЕУ) како најважен партнер во регионот, како на пример обединетоста во борбата против ковид-19. Во тој контекст ќе биде истакната меѓусебната солидарност и соработка во ова време на корона-кризата, а ќе биде потенцирани и 3,3 милијарди евра колку што се акумулираа за Западен Балкан за амортизирање на ударот од вирусот и последиците од него.
Лидерите, исто така, ќе ја потврдат европската перспектива на Западен Балкан и посветеноста на партнерите од Западен Балкан да ги поддржуваат европските вредности и принципи. Во таа насока ќе бидат разменети мислења за новата фаза на тесна соработка за решавање на значајните социо-економски влијанија на коронавирусот, важноста на регионалната соработка, како и за начините за најдобро управување со безбедносните предизвици.
Кој ќе учестува на Самитот?
На самитот ЕУ-Западен Балкан ќе учествуваат шефови на држави или влади од државите членки на Европската Унија плус претставници на шесте земји партнери од Западен Балкан – Албанија, Босна и Херцеговина, Србија, Црна Гора, Република Северна Македонија и Косово.
Со состанокот ќе претседава Шарл Мишел, претседател на Европскиот совет. Во улога на претставници на Европската Унија ќе бидат и претседателката на Европската комисија, Урсула фон дер Лајен, премиерот на Хрватска, Андреј Пленковиќ, чија земја е актуелен претседавач со ЕУ, високиот претставник за надворешни работи и безбедносна политика, Жозеп Борел и претседателот на Европскиот парламент, Давид Сасоли. На Самитот ќе учествуваат и претставници на Европската банка за обнова и развој, претставници на Светската банка, претставници на Европската инвестициска банка и претставници на Регионалниот совет.
По Самитот е најавена заедничка прес-конференција на Шарл Мишел, на Урсула фон дер Лајен и на Андреј Пленковиќ.